Փետրվարի 17-ին Ավստրիայի Սանկտ Պյոլտեն քաղաքում գումարվել է Հայ Առաքելական Եկեղեցու եպիսկոպոսների հավաքը։ Մասնակցում են ՀԱԵ 25 արքեպիսկոպոսներ և եպիսկոպոսներ, ինչպես նաև Երուսաղեմի և Կոստանդնուպոլսի Հայոց պատրիարքությունների ներկայացուցիչներ։ Ավստրիայում հավաք գումարելու որոշումը պայմանավորված է Հայաստանի ներսում Եկեղեցու դեմ տարվող արմավով։
Հանդիպումը սկզբնապես նախատեսված էր որպես Եպիսկոպոսաց ժողով՝ Եկեղեցու բարձրագույն կանոնական խորհրդակցական մարմինը։ Սակայն այն անցկացվում է «հավաքի» ձևաչափով, քանի որ Փաշինյանի և նրա կառավարության կողմից հինգ բարձրաստիճան հոգևորականների և Ամենայն Հայոց Կաթողիկոսի նկատմամբ կիրառված երկրից բացակայելու արգելքները, ինչպես նաև չորս ավագ հոգևորականների շարունակվող կալանքը, անհնար են դարձրել եպիսկոպոսաց դասի ամբողջ կազմի մասնակցությունը։ Ժողովում նախատեսվում էր քննարկել բարձրաստիճան հոգևորականների ձերբակալությունները, ՀԱԵ դեմ արշավը և հոգևոր դասի ներսում խորացող տարաձայնությունները։
Ամենայն Հայոց Կաթողիկոս Գարեգին Բ-ն մասնակիցներին դիմել է առցանց ձևաչափով։ Ուղերձներով հանդես են եկել նաև Մեծի Տանն Կիլիկիո Կաթողիկոս Արամ Ա-ն, ինչպես նաև Երուսաղեմի և Կոստանդնուպոլսի Հայոց պատրիարքները։
Հավաքը տեղի է ունենում քաղաքական սրվող առճակատման պայմաններում, որը նախաձեռնվել է Փաշինյանի կողմից և առաջ է մղվում նրա կառավարության կառույցների միջոցով։ «Տավուշը հանուն հայրենիքի» շարժումից և բարձրաստիճան հոգևորականների հրապարակային քննադատությունից հետո նա հրապարակայնորեն կասկածի տակ է դրել Կաթողիկոսի լեգիտիմությունը, բազմիցս դիմել նրան ավազանի անունով՝ շրջանցելով եկեղեցական տիտղոսը, և կոչ արել հրաժարական տալ։ Այնուհետև նա առաջ է քաշել այսպես կոչված «եկեղեցական բարեփոխումների» օրակարգը՝ այն ներկայացնելով որպես ինստիտուցիոնալ նորացում, սակայն փաստացի միջամտելով եկեղեցական գործերին։ Պաշտոնյաները, իշխող կուսակցության պատգամավորները և նրանց համախոհ հրապարակային շրջանակները առաջ են մղել այդ «բարեփոխումների» օրակարգը՝ գործող ղեկավարությանը ներկայացնելով որպես ոչ լեգիտիմ և վերակառուցման ենթակա։
Առճակատումը հռետորաբանությունից անցել է գործնական դաշտ, երբ նրա վարչակազմի ենթակայությամբ գործող քննչական մարմինները քրեական գործեր են հարուցել ազդեցիկ հոգևորականների նկատմամբ։ Եկեղեցու աջակիցների կողմից ավելի քան երկու տասնյակ անձինք դիտարկվում են որպես քաղբանտարկյալներ, այդ թվում՝ արքեպիսկոպոսներ Բագրատ Գալստանյանը, Միքայել Աջապահյանը, Արշակ Խաչատրյանը և եպիսկոպոս Մկրտիչ Պռոշյանը։ Միաժամանակ տասը բարձրաստիճան հոգևորականներ միացել են Փաշինյանի առաջ քաշած «բարեփոխումների» օրակարգին, հանդիպել նրան և հրապարակայնորեն հանդես եկել Կաթողիկոսի հրաժարականի օգտին՝ խորացնելով եպիսկոպոսության ներսում բաժանումները։
Այսպիսով, Սանկտ Պյոլտենում անցկացվող հանդիպումը տեղի է ունենում սահմանափակ կազմով, քանի որ մի շարք բարձրաստիճան հոգևորականներ շարունակում են գտնվել անազատության տակ կամ իրավական սահմանափակումների պայմաններում՝ Փաշինյանի և նրա կառավարության կողմից ընդունված միջոցառումների հետևանքով։
