Արցախի ազգային-ազատագրական շարժման՝ Հայաստանի հետ վերամիավորման մեկնարկի 37-ամյակի օրը քաղաքացիները հավաքվել էին Երևանի Ազատության հրապարակում՝ իրենց ձայնը բարձրացնելու հանուն Արցախից բռնի տեղահանված հայ բնակչության իրավունքների պաշտպանության։
Խաղաղ ցույցն անցնում էր պետական աճող ճնշման պայմաններում։ Ցույցի մեկնարկից ժամեր առաջ Փաշինյանի ռեժիմի ոստիկանությունը ոստիկանության բաժիններ էր «հրավիրում» ինչպես կազմակերպիչներին, այնպես էլ հավանական մասնակիցներին։ Տեղում հավաքված քաղաքացիների գնահատմամբ, այս գործողությունները վկայում են ներկայիս իշխանության համակարգված ահաբեկման քաղաքականության մասին՝ ուղղված հավաքը խափանելուն և հասարակության մեջ վախ սերմանելուն։
Արցախի ժողովրդի իրավունքների պաշտպանության խորհրդի անդամ Արտակ Մկրտչյանը հրապարակում հայտարարեց նստացույց սկսելու մասին՝ ընդգծելով, որ իշխանությունները նպատակաուղղված խոչընդոտում են օրինական քաղաքացիական դիմադրությունը։
«Ոստիկանությունը մեզ նախազգուշացրել է, որ երթի ցանկացած փորձ կճնշվի ուժով։ Մեր երկխոսության փորձերը փոխարինվեցին սպառնալիքներով», — ասաց Մկրտչյանը։ «Այս ռեժիմը ոչ միայն անտեսում է Արցախից տեղահանվածների ձայները, այլև լռեցնելու նպատակ ունի նրանց աջակիցներին։ Մենք չենք հրաժարվելու մեր 12 պահանջներից։ Քանի որ հերթական անգամ արգելվել է մեր երթը, ես և իմ գործընկերները սկսում ենք նստացույց։ Կոչ ենք անում քաղաքացիներին միանալ մեզ։ Յուրաքանչյուր ձայն մեզ մոտեցնում է արդարությանը»։
Չնայած ցուցարարների խաղաղ և օրենքին համապատասխան գործողություններին՝ հրապարակը շրջափակված էր մեծաքանակ ոստիկանական ուժերով՝ վկայելով իշխանությունների կոշտացող վերաբերմունքի մասին՝ հատկապես Արցախին առնչվող հարցերում։
