Հակակոռուպցիոն կոմիտեի աշխատակիցները ձերբակալել են Նոյեմբերյանի համայնքապետ, ընդդիմադիր «Ապրելու երկիր» կուսակցության անդամ Արսեն Աղաբաբյանին։
Աղաբաբյանին տեղափոխում են Երևան։ «Համայնքի ղեկավարը ձերբակալվել է Հակակոռուպցիոն կոմիտեում քննվող քրեական վարույթի շրջանակներում», հարցին ի պատասխան հայտնել են գերատեսչությունից։ Քրեական վարույթի բովանդակության և Աղաբաբյանին վերագրվող հնարավոր արարքների վերաբերյալ այլ մանրամասներ առայժմ չեն հրապարակվել։
Ձերբակալությունը տեղի է ունեցել Նոյեմբերյանում նոյեմբերի 29-ին նախատեսված ՏԻՄ ընտրություններից շուրջ երեք ամիս առաջ։
«Ապրելու երկիր» կուսակցությունը սերտ կապեր ունի Արցախի նախկին պետնախարար Ռուբեն Վարդանյանի հետ, որն ապօրինի պահվում է Ադրբեջանում։
Կուսակցությունը Վարդանյանին հրապարակայնորեն ներկայացրել է որպես գործընկեր և համախոհ, մինչդեռ Վարդանյանը 2023 թվականի Երևանի ավագանու ընտրությունների ժամանակ բացահայտ աջակցել է կուսակցությանը։
Աղաբաբյանը Փաշինյանի ռեժիմի կողմից ձերբակալված առաջին ընդդիմադիր համայնքապետը չէ։
2021 թվականի դեկտեմբերին, Վանաձորի ՏԻՄ ընտրություններից օրեր անց, ձերբակալվեց Մամիկոն Ասլանյանը։ Նրա գլխավորած ուժը ստացել էր ամենաշատ ձայները, սակայն քաղաքային իշխանությունը հետագայում զավթվեց Փաշինյանի ռեժիմի կողմից։
2025 թվականի հոկտեմբերին ձերբակալվել էր նաև Գյումրու քաղաքապետ Վարդան Ղուկասյանը՝ ընդդիմության կողմից քաղաքային իշխանությունը ստանձնելուց հետո։ Նա ամիսներ շարունակ մնացել էր կալանքի տակ, մինչև 2026 թվականի հուլիսին կալանքը փոխարինվեց տնային կալանքով։
Նույն ամսին ձերբակալվել էր նաև Մասիսի համայնքապետ Դավիթ Համբարձումյանը։ Ընդդիմությունը նրա նկատմամբ հարուցված գործը քաղաքական հետապնդում է համարում։ Ավելի ուշ Համբարձումյանի կալանքը նույնպես փոխարինվել է տնային կալանքով։
