Եվրոպայի լրագրողների ֆեդերացիան (EFJ) դատապարտել է Նիկոլ Փաշինյանի թշնամական վերաբերմունքը լրագրողների նկատմամբ՝ նոյեմբերի 19-ի մամուլի ասուլիսի ընթացքում լրագրող Հռիփսիմե Ջեբեջյանի հասցեին հնչեցրած բազմակի վիրավորանքներից հետո։
Նոյեմբերի 20-ին հրապարակված հայտարարությամբ ֆեդերացիան միացել է Հայաստանի ժուռնալիստների միության (ՀԺՄ) պահանջին՝ անհապաղ դադարեցնել լրագրողների նկատմամբ թշնամական հռետորաբանությունը, նրանց վարկաբեկելու և մասնագիտական գործունեության ընթացքում ահաբեկելու փորձերը։
Միջադեպը տեղի է ունեցել Փաշինյանի նոյեմբերի 19-ի մամուլի ասուլիսի ընթացքում, երբ Հռիփսիմե Ջեբեջյանը հարցեր է ուղղել հայ զինծառայողների զոհվելու հանգամանքների և «Եռաբլուր» զինվորական պանթեոնի վերաբերյալ, որտեղ ամփոփված են Արցախյան պատերազմների և ադրբեջանական հետագա ռազմական հարձակումների ընթացքում զոհված հայ զինծառայողները։
Բանավեճը սրվել է, երբ լրագրողը հիշեցրել է Փաշինյանի՝ քաղաքական ընդդիմախոսների հասցեին նախկինում հնչեցրած սպառնալիքները, այդ թվում՝ մարդկանց ծնկի բերելու, «ասֆալտ լիզեցնելու» և աթոռով ձեռքերը կոտրելու մասին արտահայտությունները։
Ի պատասխան՝ Փաշինյանը Ջեբեջյանին, այլ լրագրողների և ընդդիմադիր քաղաքական ուժերի, այդ թվում՝ «Ուժեղ Հայաստան» կուսակցությանը և «Հայաստան» խմբակցությանը, մեղադրել է «Եռաբլուրը» քաղաքական շահարկումների առարկա դարձնելու մեջ։
Նա բազմիցս անձնական վիրավորանքներ է հասցրել լրագրողին՝ նրա վարքագիծն անվանելով «նողկալի» և հարցականի տակ դնելով «Եռաբլուրի» մասին նրա գիտելիքները։
Ուղիղ եթերով հեռարձակված միջադեպը քննադատության է արժանացել լրագրողական կազմակերպությունների կողմից։
Հայաստանի ժուռնալիստների միության գնահատմամբ՝ տեղի ունեցածը մեկուսացված միջադեպ չէ, այլ քննադատական լրատվամիջոցների նկատմամբ ձևավորված վերաբերմունքի հերթական դրսևորումը։
Միությունը հայտարարել է, որ Փաշինյանն ու նրա քաղաքական թիմը վաղուց թիրախավորում են այն լրագրողներին և լրատվամիջոցներին, որոնք անվերապահորեն չեն կիսում իրենց տեսակետներն ու անհարմար հարցեր են ուղղում։
Եվրոպայի լրագրողների ֆեդերացիան միացել է այդ մտահոգություններին՝ Փաշինյանին կոչ անելով զսպվածություն ցուցաբերել, պահպանել հարգալից վերաբերմունք լրագրողների նկատմամբ և հարգել նրանց մասնագիտական գործունեությունը՝ անկախ քաղաքական տարաձայնություններից։
Ֆեդերացիայի դատապարտումը հնչում է Եվրոպայում լրագրողների անվտանգության և նրանց նկատմամբ ճնշումների վերաբերյալ ավելի լայն մտահոգությունների ֆոնին։ Լրագրողների նկատմամբ ոտնձգություններին նվիրված 2025 թվականի ուսումնասիրության մեջ EFJ-ն սպառնալիքները, վարկաբեկման արշավներն ու բանավոր վիրավորանքները ներկայացրել է որպես մամուլի ազատությանը սպառնացող լուրջ խնդիրներ։
EFJ-ի նախագահ Մայա Սևերն ընդգծել է, որ լրագրողի հասցեին վիրավորանքը դուրս է գալիս անձնական հակամարտության շրջանակներից։
«Լրագրողին վիրավորելը հարձակում է ոչ միայն մեկ անձի, այլև խոսքի ազատության և ժողովրդավարական հասարակության արժեքների վրա», հայտարարել է Սևերը։
Նա նաև շեշտել է, որ պետական բարձրագույն պաշտոններ զբաղեցնող անձինք առանձնահատուկ պատասխանատվություն են կրում լրագրողների և նրանց մասնագիտական աշխատանքի նկատմամբ հարգալից վերաբերմունք ցուցաբերելու հարցում։
Եվրոպայի լրագրողների ֆեդերացիան կոչ է արել Հայաստանի իշխանություններին անհապաղ դադարեցնել լրագրողների նկատմամբ թշնամական հռետորաբանությունը և վերջ տալ նրանց մասնագիտական գործունեությունը խոչընդոտելու, վարկաբեկելու ու ահաբեկելու փորձերին։