Ստամբուլի իշխանությունները կրկին քայլեր են ձեռնարկում Հայոց ցեղասպանության հիշողությունը ճնշելու ուղղությամբ՝ արգելելով ապրիլի 24-ին նախատեսված հիշատակի միջոցառումը և շարունակելով համակարգային ժխտման ու սահմանափակումների գործելակերպը։

Ստամբուլում լույս տեսնող «Ակոս» հայկական թերթի փոխանցմամբ՝ «Ապրիլի 24-ի հիշողության հարթակը» դիմում էր ներկայացրել Քադըքյոյ շրջանում հիշատակի միջոցառում անցկացնելու համար, սակայն քաղաքային իշխանությունները մերժել են հայտը։ Ի պատասխան՝ կազմակերպությունը շեշտել է, որ նման միջոցառումների անցկացումը հիմնարար ժողովրդավարական իրավունք է և կոչ է արել վերանայել որոշումը։

Սա մեկուսացված դեպք չէ։ Վերջին տարիներին նմանատիպ դիմումները պարբերաբար մերժվում են, չնայած այն հանգամանքին, որ նախկինում Ստամբուլում հիշատակի միջոցառումները անցկացվում էին կանոնավոր կերպով։

Զարգացումները տեղի են ունենում այն պայմաններում, երբ Հայաստանի ներկայիս ղեկավարությունը լայնորեն քննադատվում է Հայոց ցեղասպանության միջազգային ճանաչումը երկրորդ պլան մղելու համար, ինչը մտահոգություններ է առաջացնում պատմական հիշողության և դրա առաջխաղացման վերաբերյալ պետական քաղաքականության ընդհանուր ուղղության շուրջ։

Միևնույն ժամանակ, հենց այս իշխանությունների և այս քաղաքական միջավայրի հետ է Նիկոլ Փաշինյանը վարում «խաղաղության» քաղաքականություն՝ այն դեպքում, երբ նրանք շարունակում են արգելել Հայոց ցեղասպանության հանրային հիշատակումը և սահմանափակել պատմական հիշողության հետ կապված հիմնարար քաղաքացիական ազատությունները։