Հնդկաստանի Մալանկարայի ուղղափառ ասորական եկեղեցու առաջնորդ Բասելիոս Մարթոմա Մատթեոս Գ-ն զորակցություն է հայտնել Ամենայն հայոց կաթողիկոս Գարեգին Բ-ին՝ անհիմն որակելով Նիկոլ Փաշինյանի իշխանությունների կողմից Հայոց հայրապետի արտասահմանյան ուղևորությունների նկատմամբ, ըստ հաղորդումների, սահմանված սահմանափակումները։
Այս մասին նա խոսել է Մոսկվայի հայկական եկեղեցական համալիր այցելության ընթացքում։ Այցը տեղի է ունեցել Մոսկվայի և Համայն Ռուսիո պատրիարք Կիրիլի 80-ամյակին նվիրված հանդիսությունների շրջանակում։
Մալանկարայի եկեղեցու առաջնորդին և նրան ուղեկցող պատվիրակությանը դիմավորել է Ռուսաստանի և Նոր Նախիջևանի հայոց թեմի առաջնորդ Եզրաս արքեպիսկոպոս Ներսիսյանը։
Հանդիպման ընթացքում Մատթեոս Գ-ն ափսոսանք է հայտնել, որ Գարեգին Բ-ի արտերկիր մեկնելու նկատմամբ կիրառվող սահմանափակումների պատճառով հնարավորություն չի ունեցել անձամբ հանդիպելու Հայոց հայրապետին։ Նա մտահոգություն է հայտնել ստեղծված իրավիճակի առնչությամբ և հույս հայտնել, որ ապագայում նման հանդիպում հնարավոր կլինի կազմակերպել։
Մալանկարայի եկեղեցու առաջնորդն ընդգծել է նաև երկու եկեղեցիների միջև գոյություն ունեցող պատմական ու հոգևոր կապերը՝ նշելով, որ նրանց միավորում են ընդհանուր քրիստոնեական հավատքն ու դարավոր եղբայրական հարաբերությունները։
Մալանկարայի ուղղափառ ասորական եկեղեցին Հնդկաստանի հնագույն քրիստոնեական եկեղեցիներից է, որի կենտրոնը գտնվում է Կերալա նահանգի Կոտտայամ քաղաքում։ Եկեղեցական ավանդության համաձայն՝ Հնդկաստանում քրիստոնեության տարածումը սկիզբ է առել դեռևս առաջին դարում՝ Թովմաս առաքյալի քարոզչությամբ։
Ինչպես Հայ առաքելական եկեղեցին, այնպես էլ Մալանկարայի եկեղեցին պատկանում է Հին արևելյան ուղղափառ եկեղեցիների ընտանիքին։ Այդ ընտանիքի անդամ են նաև Ղպտի, Ասորի, Եթովպական և Էրիթրեական ուղղափառ եկեղեցիները։ Դրանք ընդունում են առաջին երեք տիեզերական ժողովների որոշումները և գտնվում են լիակատար եկեղեցական հաղորդության մեջ։
Մալանկարայի եկեղեցին, իր պաշտոնական տվյալների համաձայն, ամբողջ աշխարհում ունի շուրջ 2,5 միլիոն հավատացյալ։ Բասելիոս Մարթոմա Մատթեոս Գ-ն 2021 թվականի հոկտեմբերից զբաղեցնում է Արևելքի կաթողիկոսի և Մալանկարայի միտրոպոլիտի պաշտոնը։
Մալանկարայի եկեղեցու առաջնորդի զորակցության հայտարարությունը հնչում է Նիկոլ Փաշինյանի իշխանությունների և Հայ առաքելական եկեղեցու միջև շարունակվող լարվածության պայմաններում։ Գարեգին Բ-ի միջազգային ուղևորությունների նկատմամբ հաղորդվող սահմանափակումներն արդեն մտահոգություն են առաջացնում նաև Հայ եկեղեցու հետ դարավոր հոգևոր կապեր ունեցող քույր եկեղեցիների ներկայացուցիչների շրջանում։