«ՀայաՔվե» նախաձեռնության համակարգող, ընդդիմադիր գործիչ և քաղբանտարկյալ Ավետիք Չալաբյանը շուրջ երկու ամիս նախնական կալանքի տակ գտնվելուց հետո ազատ է արձակվել։

Հունիսի 7-ի խորհրդարանական ընտրություններին առնչվող քրեական գործով դատարանը նրա նկատմամբ որևէ խափանման միջոց չի կիրառել։ Որոշումը կայացրել է դատավոր Դավիթ Բալայանը օգոստոսի 21-ին՝ առաջին դատական նիստի ընթացքում, որից հետո Չալաբյանն ազատ է արձակվել դատարանի դահլիճից։

Չալաբյանը ձերբակալվել էր հունիսի 24-ին։ Ըստ մեղադրանքի՝ նա մի խումբ անձանց հետ նախնական համաձայնությամբ փորձել է խոչընդոտել քաղաքացիների ընտրական իրավունքի իրականացմանը՝ օգտագործելով պաշտոնեական ազդեցություն։ Քննության վարկածով՝ Չալաբյանը նաև փորձել է աջակցություն ներգրավել՝ արտերկրում աշխատող Հայաստանի քաղաքացիների վերադարձը կազմակերպելու և նրանց «Ուժեղ Հայաստան» դաշինքի օգտին քվեարկելուն խրախուսելու համար։

Չալաբյանն ու նրա պաշտպանները չեն ընդունում առաջադրված մեղադրանքները՝ գործը համարելով քաղաքական հետապնդում, իսկ նրա կալանավորումը՝ քաղաքական դրդապատճառներով պայմանավորված։

Չալաբյանը «ՀայաՔվե» նախաձեռնության համակարգողն է և Նիկոլ Փաշինյանի ընդդիմախոսներից մեկը։ Չալաբյանը «ՀայաՔվե» նախաձեռնության համակարգողն է և Նիկոլ Փաշինյանի ընդդիմախոսներից մեկը։

Չալաբյանը նախկինում ևս քաղաքական հետապնդման է ենթարկվել։ 2022 թվականին՝ Նիկոլ Փաշինյանի հրաժարականի պահանջով ընթացող ընդդիմադիր ցույցերի ժամանակ, նա ձերբակալվել էր մեկ այլ քրեական գործով և մի քանի ամիս անցկացրել կալանքի տակ։ Այդ գործով կայացված մեղադրական դատավճիռը հետագայում վերացվել է վերաքննիչ դատարանի կողմից։