Իսրայելի վարչապետ Բենիամին Նեթանյահուն անձամբ միջամտել է՝ կանխելու Իսրայելի խորհրդարանի (Քնեսեթ) կողմից Հայոց ցեղասպանության ճանաչման վերաբերյալ նախատեսված քվեարկությունը այն բանից հետո, երբ Ադրբեջանի բարձրաստիճան պաշտոնյաները ճնշում են գործադրել Իսրայելի իշխանությունների վրա՝ պահանջելով դադարեցնել նախաձեռնությունը։ Այդ մասին հայտնում է Haaretz-ը։

Իսրայելի կառավարությունը հունիսի վերջին միաձայն հավանություն էր տվել նախաձեռնությանը, որը ներկայացրել էր արտգործնախարար Գիդեոն Սաարը։ Սակայն այն ուժի մեջ մտնելու համար դեռ պետք է հաստատվեր Քնեսեթի կողմից։

Haaretz-ի տեղեկություններով, Ադրբեջանի նախագահ Իլհամ Ալիևի արտաքին քաղաքականության հարցերով խորհրդական Հիքմեթ Հաջիևը Ալիևի անունից կապ է հաստատել Նեթանյահուի գրասենյակի հետ։ Դրանից հետո Նեթանյահուն անձամբ ապահովել է, որ օրինագիծը հանվի Քնեսեթի օրակարգից մինչև խորհրդարանի անցնելը ամառային արձակուրդի անցած ուրբաթ, ինչի հետևանքով քվեարկությունը չի կայացել։

Նախաձեռնությունը լայնորեն դիտարկվում էր որպես Թուրքիայի հասցեին ուղղված դիվանագիտական ուղերձ՝ Գազայի պատերազմի ֆոնին Իսրայելի և Թուրքիայի հարաբերությունների կտրուկ վատթարացման պայմաններում։ Թուրքիան բազմիցս մեղադրել է Իսրայելին պաղեստինյան տարածքներում ցեղասպանություն իրականացնելու մեջ։

Պատասխանելով Haaretz-ի հարցմանը՝ արտգործնախարար Գիդեոն Սաարի գրասենյակը հերքել է, որ Նեթանյահուն արգելափակել է քվեարկությունը, սակայն չի ներկայացրել որևէ այլ բացատրություն, թե ինչու է նախաձեռնությունը հանվել օրակարգից։ Նեթանյահուի գրասենյակը և Հիքմեթ Հաջիևը չեն արձագանքել թերթի հարցումներին։

Քնեսեթն այժմ արձակուրդում է մինչև հոկտեմբերի 27-ին նախատեսված Իսրայելի խորհրդարանական ընտրություններից հետո, ինչի պատճառով քիչ հավանական է, որ օրինագիծը կրկին քննարկվի գործող գումարման ընթացքում։

Ադրբեջանը բացահայտորեն դեմ էր արտահայտվել Իսրայելի կառավարության կողմից Հայոց ցեղասպանությունը ճանաչելու նախաձեռնությանը։ Բաքուն, որը Թուրքիայի հետ ունի սերտ քաղաքական, ռազմական և ռազմավարական հարաբերություններ, տարիներ շարունակ ակտիվորեն պայքարում է Հայոց ցեղասպանության միջազգային ճանաչման դեմ։