ԵՄ Արևելյան գործընկերության երկրներում քաղաքացիական հասարակության միջավայրը գնահատող CSO Meter միջազգային նախաձեռնությունը հերթական անգամ բացասական զարգացումներ է արձանագրել Հայաստանում՝ անդրադառնալով խոսքի ազատության սահմանափակումներին և քաղաքական հետապնդումների վերաբերյալ մտահոգություններին։
Նախաձեռնության հրապարակման մեջ անվանապես հիշատակվում են Վահրամ Սահակյանի, Արթուր Դանիելյանի և Արթուր Օսիպյանի գործերը՝ որպես իշխանությունների հասցեին հնչեցված քննադատության առնչությամբ քրեական հետապնդումների օրինակներ։
CSO Meter-ն ուշադրություն է հրավիրել պետական պաշտոնյաների նկատմամբ քննադատական արտահայտությունների համար քրեական օրենսդրության կիրառման վրա՝ մտահոգություն հայտնելով նման գործերի հնարավոր անհամաչափության և խոսքի ազատության վրա դրանց զսպող ազդեցության վերաբերյալ։
Նախաձեռնությունն անդրադարձել է նաև ծանր վիրավորանքի ապաքրեականացումից հետո քրեական օրենսգրքի այլ հոդվածներով հետապնդումների շարունակմանը։
Հրապարակման մեջ հիշատակվում է նաև Քաղաքական իրավունքների հայկական կենտրոնի զեկույցը, որում քննադատվում է քրեական օրենսդրության կիրառումը քաղաքական քննադատության նկատմամբ։
CSO Meter-ի նախորդ գնահատմամբ՝ Հայաստանում խոսքի ազատության ցուցանիշը 7 միավորանոց սանդղակով նվազել էր 4.9-ից մինչև 4.8։
Նոր հրապարակումը ևս մտահոգություններ է արձանագրում Հայաստանում քաղաքացիական ազատությունների պաշտպանության և քննադատական խոսքի նկատմամբ քրեական հետապնդումների կիրառման վերաբերյալ։
