Ադրբեջանական Unikal.az-ը զգուշացնում է, որ Վարդանյանի կինը կարող է բանտարկվել, եթե մեկնի ամուսնուն տեսակցելու Բաքու
Ադրբեջանական Unikal.az կայքը պնդել է, որ Վերոնիկա Զոնաբենդը կարող է մինչև հինգ տարվա ազատազրկման ենթարկվել, եթե մեկնի Բաքու՝ տեսակցելու իր ամուսնուն՝ ապօրինի պահվող հայ պատանդ Ռուբեն Վարդանյանին։ Որպես հիմք նշվել է Զոնաբենդի՝ 2022 թվականին Արցախ կատարած այցը։
Զոնաբենդը այժմ դիմել է Հայաստանի Անվտանգության խորհրդի քարտուղար Ալեն Սիմոնյանին՝ խնդրելով իրեն ուղեկցել, եթե վերջինս մեկնի Բաքու։ Սիմոնյանը վերջերս հայտարարել էր, որ չի բացառում Ադրբեջան մեկնելու հնարավորությունը, սակայն չի ասել, որ նման այցի վերաբերյալ որոշում արդեն կայացվել է։
Սեպտեմբերի 8-ին Զոնաբենդը նրան առաջարկել է միասին մեկնել Բաքու և կազմակերպել հանդիպումներ այնտեղ ապօրինի պահվող հայ պատանդների հետ։
«Ես պատրաստ եմ ձեզ հետ մեկնել Բաքու», գրել է նա՝ նշելով, որ նույն ցանկությունն ունեն նաև մյուս պատանդների հարազատները։
Զոնաբենդը նաև հարցրել է՝ արդյոք Սիմոնյանը մտադիր է այցելել հայ պատանդներին և մինչ հնարավոր այցը կհանդիպի՞ նրանց ընտանիքների հետ՝ լսելու նրանց խնդրանքներն ու Բաքու փոխանցելու նամակներ։
Unikal.az-ի հրապարակումը նախորդել էր Զոնաբենդի այս դիմումին։ Օգոստոսի 31-ին հրապարակված նյութում ադրբեջանական կայքը հղում էր արել Forbes Woman-ին տված նրա հարցազրույցին, որտեղ Զոնաբենդը պատմել էր Արցախում Վարդանյանի հետ վերջին հանդիպման և Բաքու մարդասիրական այց կազմակերպելու իր ջանքերի մասին։
Unikal.az-ը Զոնաբենդի՝ 2022 թվականին Արցախ կատարած այցը ներկայացրել է որպես «ապօրինի մուտք» և, հղում անելով Ադրբեջանի քրեական օրենսգրքի սահմանը առանց թույլտվության հատելու վերաբերյալ հոդվածներին, պնդել է, որ Բաքու ժամանելու դեպքում նրան կարող է սպառնալ մինչև հինգ տարվա ազատազրկում։
Զոնաբենդը փորձում է կազմակերպել կանանց միջազգային մարդասիրական պատվիրակություն՝ Բաքվում ապօրինի պահվող հայ պատանդներին այցելելու և նրանց ընտանիքներից նամակներ, լուսանկարներ ու անձնական իրեր փոխանցելու նպատակով։ Նա ընդգծել է, որ նախաձեռնությունը բացառապես մարդասիրական բնույթ ունի և իրականացվում է պաշտոնական ու դիվանագիտական ուղիներով՝ մասնակիցների համար անվտանգության երաշխիքներ ստանալու նպատակով։
Ռուբեն Վարդանյանը՝ հայ բարերար և Արցախի նախկին պետնախարար, ադրբեջանական ուժերի կողմից պատանդ է վերցվել 2023 թվականի սեպտեմբերի 27-ին՝ Բերձորի (Լաչինի) միջանցքի ադրբեջանական անցակետում, երբ փորձում էր լքել Արցախը ադրբեջանական էթնիկ զտումների ընթացքում։
2026 թվականի փետրվարին Բաքվի ռազմական դատարանը նրան ապօրինի դատապարտել է 20 տարվա ազատազրկման։
Վարդանյանը շարունակում է ապօրինի պահվել Ադրբեջանում՝ մյուս հայ պատանդների, այդ թվում՝ Արցախի նախկին պաշտոնյաների հետ։
