Շաքիում հայ մայրը սեփական մարմնով պաշտպանել է իր երեխաներին զինված ադրբեջանցի զինծառայողից՝ ձեռքով մի կողմ հրելով նրանց ուղղված ինքնաձիգը։ Կրակոցից նա վիրավորվել է և կորցրել ձախ ձեռքի երեք մատը։
Անիի քույրը՝ Արփի Ավետիսյանը, լրագրողներին պատմել է, որ ադրբեջանցի զինծառայող Նասիմի Մուսաևը կոտրել է տան պատուհանն ու դռան փականը, ներխուժել տուն և խոհանոցում սնունդ փնտրել։
Ավելի ուշ Անիի դպրոցահասակ երեխաները տուն են մտել և այնտեղ հայտնաբերել Մուսաևին։ Երբ երեխաները սկսել են գոռալ և կանչել մորը, նա վերցրել է նրանց հեռախոսները։
Այդ պահին Անին Սիսիանում էր։ Երեխաներից մեկին հաջողվել է հեռախոսակապը բաց պահել, ինչի շնորհիվ Անին լսել է, թե ինչ է կատարվում։ Նա անմիջապես մեկնել է Շաքի և հարևանի պատի վրայով անցել՝ տուն հասնելու համար, չնայած երեխաները գոռացել են, որ չմոտենա, քանի որ Մուսաևը զինված է։
Ավետիսյանի խոսքով՝ Մուսաևը զենքն ուղղել էր երեխաների կողմը, երբ Անին կանգնել է նրանց առջև և ձեռքով փորձել մի կողմ հրել ինքնաձիգը։ Մուսաևը կրակել է՝ վիրավորելով Անիի ազդրը և պոկելով ձախ ձեռքի երեք մատը։
Երբ Մուսաևը փորձել է վերալիցքավորել զենքը, Անին դանակ է վերցրել և հարվածել նրա գլխի ու կրծքավանդակի հատվածներին, ապա կորցրել գիտակցությունը։ Դրանից հետո Անիի 15-ամյա որդին հարվածել է Մուսաևի գլխին՝ կոտրելով սեփական մատները։ Տղայի մատներից մեկը գիշերը վիրահատվել է։
Նույն օրը Մուսաևը ձերբակալվել է։
ՀՀ ԱԱԾ-ն հայտնել է, որ դեռ սեպտեմբերի 29-ին ադրբեջանական կողմը տեղեկացրել էր՝ զինծառայողը լքել է զորամասը և հնարավոր է՝ ապօրինի հատել ՀՀ սահմանը։ Ադրբեջանի գլխավոր դատախազության տվյալներով՝ Մուսաևը սեպտեմբերի 26-ին անհետացել էր օկուպացված Արցախի Բերձորի շրջանում տեղակայված զորամասից։
ԱԱԾ-ն մինչ այժմ հրապարակային պարզաբանում չի տվել, թե ինչպես է զինված ադրբեջանցի զինծառայողը հատել ՀՀ սահմանը և հասել Շաքի՝ առանց հայտնաբերվելու։
Անիի կյանքին վտանգ չի սպառնում։ Դեպքի առթիվ քրեական վարույթ է նախաձեռնվել։
