Ադրբեջանը շարունակում է ընդլայնել և ամրացնել Հայաստանի ինքնիշխան տարածքում՝ Սյունիքի մարզի Սև լճի մերձակայքում տեղակայված իր ռազմական դիրքերը։ Այս մասին են վկայում լրագրող Դավիթ Գալստյանի ուսումնասիրած արբանյակային լուսանկարները։
❗️ Azerbaijani Armed Forces have fortified positions on the territory of #Armenia near Lake Sev
1/ Sentinel-2 satellite imagery I examined shows that in 2024–2026, Azerbaijan carried out noticeable engineering work here — as well as further north in Syunik, near Jermuk. pic.twitter.com/cEL78jaAFP
— David Galstyan (@Aeternum7) October 31, 2026
Հոկտեմբերի 31-ին «Sputnik Արմենիա»-ում հրապարակված հետաքննության մեջ Գալստյանը համեմատել է 2024 թվականի հուլիսի և 2026 թվականի սեպտեմբերի «Sentinel-2» արբանյակային լուսանկարները։ Դրանցում երևում են նոր գրունտային ճանապարհներ, լայնացված ճանապարհահատվածներ, հարթեցված տարածքներ, նոր կառույցներ և ռազմական դիրքերի ամրացմանն ուղղված ինժեներական աշխատանքներ։
Ըստ ուսումնասիրության՝ ադրբեջանական դիրքերը գտնվում են Հայաստանի միջազգայնորեն ճանաչված սահմանների ներսում։ Դրանց տեղակայումը ՀՀ տարածքում հաստատվում է նաև ԽՍՀՄ Զինված ուժերի գլխավոր շտաբի 1975 թվականի քարտեզներով։ Արբանյակային լուսանկարների համեմատությունը ցույց է տվել, որ որոշ հատվածներում շինարարական և ամրաշինական աշխատանքներ են իրականացվել դեռևս 2024-2025 թվականներին։
Ավելի վաղ՝ հոկտեմբերին, Գալստյանը հրապարակել էր մեկ այլ հետաքննություն, որով բացահայտել էր ադրբեջանական ռազմական դիրքերի ընդլայնումը Ջերմուկի մերձակայքում։ Լրագրողն արձանագրել է նաև Հայաստանի Սյունիքի և Տավուշի մարզերում տեղակայված ադրբեջանական դիրքերի ամրացման նոր աշխատանքներ։
Ուշագրավ է, որ այդ աշխատանքները շարունակվել են նաև Տավուշում խորհրդային շրջանի քարտեզների հիման վրա հայ-ադրբեջանական սահմանազատման գործընթացի մեկնարկից և 2025 թվականի օգոստոսի 8-ին Վաշինգտոնում խաղաղության համաձայնագրի նախաստորագրումից հետո։
Այսպիսով, մինչ Հայաստանն ու Ադրբեջանը շարունակում են սահմանազատման գործընթացն ու դիվանագիտական բանակցությունները, արբանյակային լուսանկարները փաստում են, որ Ադրբեջանը շարունակում է ամրապնդել իր ռազմական ներկայությունը Հայաստանի ինքնիշխան տարածքում։
Ընդլայնման ամբողջական ծավալը դեռևս պարզ չէ։ Հետաքննության մեջ ներկայացված են այն հիմնական հատվածները, որտեղ արբանյակային լուսանկարներով հնարավոր է եղել արձանագրել փոփոխությունները։
